மனமாற்றத்திற்கான நேரம். இன்றைய இறைமொழி. சனி, 26 அக்டோபர் 2024

Saturday, October 26, 2024   Fr. Yesu Karunanidhi   Archdiocese of Madurai

Daily Catholic Lectio இன்றைய இறைமொழி Ordinary Time

இன்றைய இறைமொழி
சனி, 26 அக்டோபர் 2024
பொதுக்காலம் 29-ஆம் வாரத்தின் சனி
எபேசியர் 4:7-16. லூக்கா 13:1-9

 

மனமாற்றத்திற்கான நேரம்

 

இயேசுவின் சமகாலத்தில் ஒருவர் செய்த பாவத்திற்கு அவர் உடனடியாகத் தண்டிக்கப்படுவார் என்றும், ஒருவருக்கு நேர்கின்ற விபத்து மற்றும் ஆபத்துகளுக்கு அவருடைய பாவச் செயல்களே காரணம் என்றும் மக்கள் புரிந்துகொண்டனர். இதே புரிதலை முன்வைத்து சில இடங்களில் இன்றும் போதகர்கள் போதிக்கின்றனர். கடவுள் நம் பாவங்களுக்கு ஏற்ப நம்மை நடத்துவதில்லை என்ற புரிதல் நமக்கு அவசியம்.

 

இயேசுவைப் பொருத்தவரையில், விபத்துகள் மற்றும் ஆபத்துகள் இயல்பாக நடக்கக் கூடியவை. மேலும், அவற்றால் ஒருவர் பலியானார் என்றால் அதற்குக் காரணம் அவர் பாவி என்பது அல்ல. அதே வேளையில், நமக்கு விபத்தும் ஆபத்தும் எந்த நேரமும் வரலாம் என்ற நிலையில் உடனடியாக மனமாற்றம் அடைய வேண்டும்.

 

இரண்டாம் பகுதியில், மூன்று ஆண்டுகளாகக் கனி கொடாத அத்தி மரத்திற்கு மீண்டும் ஒரு வருடம் அவகாசம் கேட்கின்றார் தொழிலாளர். இது உருவகமாக இயேசுவின் போதனையைக் கேட்டு மனம் மாறாதவர்களைக் குறித்தாலும், இன்னொரு பக்கம் கடவுளின் பொறுமையையும் காட்டுகின்றது. கடவுளின் பொறுமை நம் மனமாற்றத்திற்கான நேர அவகாசமே.

 

இன்றைய நற்செய்தி நமக்கு முன்வைக்கும் பாடங்கள் எவை?

 

(அ) ஒருவரின் இல்லாமை மற்றும் இயலாமை கண்டு அவரைப் பாவி எனச் சாடுதல் தவறு.

 

(ஆ) மனமாற்றத்திற்கான வாய்ப்பு இன்றே, இப்போதே வழங்கப்படுகிறது என்ற நிலையில், நாம் உடனடியாக நம்மை மாற்றிக்கொள்வது.

 

(இ) கடவுள் நமக்கு எப்போதும் இரண்டாம் வாய்ப்பை வழங்குகின்றார். எப்படியாவது கொத்தி எருப்போட்டு நம்மைக் கனிகொடுக்க வைக்க முயற்சி செய்கின்றார். அந்த இரண்டாம் வாய்ப்பைப் பயன்படுத்திக்கொள்வது நலம்.

 

இன்றைய முதல் வாசகத்தில், எபேசு நகர மக்களுக்கு அறிவுறுத்துகிற பவுல், ‘தலையாகிய கிறிஸ்துவைப் போன்று எல்லாவற்றிலும் நாம் வளர வேண்டும்’ என அறிவுறுத்துகின்றார். வளர்ச்சிக்கும் வீக்கத்துக்கும் உள்ள வித்தியாசம் ஒன்றுதான் – ஒருமைப்பாடு. நம் உடலில் ஒருங்கிணைந்த வளர்ச்சி நடைபெறும்போது நாம் வளர்கிறோம் எனச் சொல்கிறோம். ஒரு குறிப்பிட்ட இடத்தில் உள்ள வளர்ச்சியை வீக்கம் என்கிறோம். வளர்ச்சி நமக்கு வலி தருவதில்லை. ஆனால், வீக்கம் நமக்கு வலி தருகிறது.

 

நிற்க.

 

‘எதிர்நோக்கின் திருப்பயணிகள்’ மனமாற்றத்துக்கான காலத்தை அறிந்தவர்களாக இருக்கிறார்கள். (யூபிலி கி.பி. 2025, துணுக்கு 235).

 

அருள்திரு யேசு கருணாநிதி
மதுரை உயர்மறைமாவட்டம்
இரக்கத்தின் தூதுவர்