இறைவார்த்தையின் ஒளியில் நம்பிக்கையை வளர்ப்போம்.

"எல்லாவற்றிற்கும் மேலாக உன் இதயத்தைக் காவல் செய்; ஏனெனில் அதனின்றே வாழ்வின் ஊற்றுகள் புறப்படுகின்றன.” நீதிமொழிகள் 4:23

தீபகத்திலிருந்து இறையாசீர்!

 

அன்பிற்கினிய குழந்தைகளே, இளைஞர்களே, பெற்றோர்களே,

செப்டம்பர் மாதத்தை நாம் விவிலிய மாதமாகக் கொண்டாடுகின்றோம். நமது இல்லங்களில் விவிலியத்தை அலங்கரித்து வைப்பது மட்டும் போதாது அதைத் திறந்து வாசிக்கவும், தியானிக்கவும், வாழ்வாக்கவும் வேண்டும். ஏனெனில் இறைவார்த்தை நம் பாதைக்கு விளக்காகவும், வாழ்க்கைக்கு ஒளியாகவும் இருக்கிறது (திருப்பாடல் 119:105).

நமது இதயம் ஓர் அழகிய தோட்டத்தைப் போன்றது. அதில் நல்ல விதைகளும் விதைக்கப்படலாம் தேவையற்ற களைகளும் வளரலாம். அன்பு, உண்மை, நம்பிக்கை, மன்னிப்பு, தூய்மை, இரக்கம், இறைநம்பிக்கை ஆகியவை நல்ல விதைகள். பொறாமை, கோபம், வெறுப்பு, பொய், சுயநலம், தவறான எண்ணங்கள், தீய பழக்கங்கள் ஆகியவை களைகள். நாம் எதற்குத் தொடர்ந்து தண்ணீர் ஊற்றுகிறோமோ அதுவே நம்மில் வளரும்.

 

இதயத்தின் வாசலைக் காப்போம்

 

நமது கண்கள், காதுகள், எண்ணங்கள் மற்றும் உறவுகள் வழியாகப் பல செய்திகள் இதயத்திற்குள் நுழைகின்றன. கைப்பேசி, சமூக ஊடகம், திரைப்படங்கள், நண்பர்கள் மற்றும் சுற்றுப்புறச் சூழல் நம்மைத் தொடர்ந்து பாதிக்கின்றன. அனைத்தையும் நாம் தவிர்க்க முடியாது ஆனால் எதை ஏற்றுக்கொள்வது, எதை விலக்குவது என்பதைத் தீர்மானிக்கலாம்.

ஒரு தவறான எண்ணம் நம்மைத் தேடி வரலாம் ஆனால் அதற்கு நம் இதயத்தில் இடம் கொடுப்பதா என்பதை நாம்தான் தீர்மானிக்க வேண்டும். புனித பவுல் கூறுவது போல, "உண்மையானவை, மாண்புடையவை, நீதியானவை, தூய்மையானவை, அன்புக்குரியவை ஆகியவற்றையே எண்ணுங்கள்" (பிலிப்பியர் 4:8).

 

இறைவார்த்தை - நல்ல விதை

 

இயேசு விதைப்பவர் உவமையில் இறைவார்த்தையை நல்ல விதைக்கு ஒப்பிடுகிறார். நல்ல நிலத்தில் விழுந்த விதை மிகுந்த பலன் தருகிறது (மாற்கு 4:1-20). நமது இதயம் நல்ல நிலமாக மாறும்போது, இறைவார்த்தை நமது சிந்தனை, பேச்சு, செயல்கள் மற்றும் உறவுகளை மாற்றுகிறது.

குழந்தைகளே, தினமும் ஒரு விவிலிய வசனத்தை வாசியுங்கள். அது உங்களுக்கு நல்லதைத் தேர்ந்தெடுக்கக் கற்றுத் தரும்.

இளைஞர்களே, வாழ்க்கையின் நோக்கம், எதிர்காலம், உறவுகள் மற்றும் அழைப்பு பற்றிய குழப்பங்களுக் குழப்பங்களுக்கு இறைவார்த்தையின் ஒளியில் பதில் தேடுங்கள். சமூக ஊடகத்தின் குரலைவிட இறைவனின் குரலுக்கு அதிக இடம் கொடுங்கள்.

பெற்றோர்களே, பிள்ளைகளுக்கு உணவு, கல்வி, பாதுகாப்பு ஆகியவற்றைக் கொடுப்பதைப் போலவே இறைவார்த்தையையும் வழங்குங்கள். குடும்பமாகச் சேர்ந்து விவிலியத்தை வாசித்து, ஒரு வசனத்தைப் பகிர்ந்து, சிறிது நேரம் செபியுங்கள். பெற்றோரின் வாழும் சாட்சியே பிள்ளைகளுக்குக் கிடைக்கும் முதல் நம்பிக்கைக் கல்வியாகும்.

 

களைகளை அகற்றுவோம்

 

ஒரு தோட்டத்தில் நல்ல செடிகள் தானாகவே வளர்வதில்லை. மண்ணைப் பண்படுத்தி, தண்ணீர் ஊற்றி, களைகளை அகற்ற வேண்டும். அதுபோல நமது இதயத்தையும் தினமும் பரிசோதிக்க வேண்டும்.

இன்று நான் எந்த நல்ல விதையை வளர்த்தேன்? எந்தத் தீய எண்ணத்திற்கு இடம் கொடுத்தேன்? யாரையாவது காயப்படுத்தினேனா? யாருக்கு உதவினேன்? இறைவார்த்தை என்னை எந்த மாற்றத்திற்கு அழைக்கிறது?

நமது பலவீனங்களைக் கண்டு மனம் தளர வேண்டாம். அவற்றை இறைவனிடம் நேர்மையாக ஒப்படைக்க வேண்டும். நமது பலவீனம் அருளின் செயல்பாட்டிற்கான இடமாக மாறலாம். இறைவன் நம்மை ஒரே நாளில் முழுமையானவர்களாக மாற்றுவதில்லை நாள்தோறும் சிறிய நற்செயல்களின் வழியாக நம்மை வளர்க்கிறார்.

நம்பிக்கைக் கல்வி வாழ்வாகட்டும் நம்பிக்கைக் கல்வி என்பது சில செபங்களையும் விவிலிய வசனங்களையும் மனப்பாடம் செய்வது மட்டும் அல்ல. அது இயேசுவைப் போலச் சிந்திக்கவும், பேசவும், மன்னிக்கவும், பகிரவும், பிறருக்கு உதவவும் கற்றுக்கொள்வதாகும். இறைவார்த்தை அறிவை மட்டும் கொடுக்காமல், நமது பண்பையும் வாழ்வையும் மாற்ற வேண்டும்.

 

இந்த விவிலிய மாதத்தில் ஒவ்வொரு குடும்பமும் ஒரு சிறிய முடிவை எடுப்போம்:

• தினமும் குறைந்தது ஒரு விவிலியப் பகுதியை வாசிப்போம்.
• ஒரு வசனத்தைத் தேர்ந்தெடுத்து குடும்பமாகப் பகிர்ந்துகொள்வோம்
• வாரம் ஒருமுறை குடும்ப இறைவார்த்தைச் செபம் நடத்துவோம்.
• வாசித்த இறைவார்த்தையை ஒரு நற்செயலாக வாழ்வாக்குவோம்.

நமது இல்லத்தை அன்பு, மன்னிப்பு, ஒற்றுமை நிறைந்த இதயத் தோட்டமாக மாற்றுவோம்.
இறைவனே நமது வாழ்க்கையின் உண்மையான தோட்டக்காரர். அவரது வார்த்தையே விதை, நமது இதயம் நிலம், செபம், தண்ணீர், நற்குணங்கள் - கனிகள். அவர் விதைக்கும் ஒவ்வொரு நல்ல விதையையும் அன்போடு பாதுகாத்து வளர்ப்போம்.

இந்தச் செப்டம்பர் மாதம் நமது இல்லங்களில் விவிலியம் திறக்கப்படும் மாதமாக மட்டுமல்லாமல், நமது இதயங்கள் இறைவனுக்குத் திறக்கப்படும் மாதமாகவும் அமையட்டும்.

 

இறைவார்த்தையை வாசிப்போம்!

இதயத்தில் விதைப்போம்!

வாழ்வில் கனிகொடுப்போம்!

 

அன்பும் செபமும் கலந்த வாழ்த்துகளுடன்,

முனைவர் அருட்பணி. ஜேசுதாஸ் ச.ச.

இயக்குநர் தீபகம்